ਨਵੀਂ ਦਿੱਲੀ : ਬਾਜ਼ਾਰ ‘ਚ ਟਾਟਾ ਵਾਹਨਾਂ ਦੀ ਮੰਗ ਲਗਾਤਾਰ ਵਧ ਰਹੀ ਹੈ।
ਦੂਜੇ ਪਾਸੇ ਦੇਸ਼ ਦੀ ਸਭ ਤੋਂ ਵੱਡੀ ਵਾਹਨ ਨਿਰਮਾਤਾ ਕੰਪਨੀ ਮਾਰੂਤੀ ਸੁਜ਼ੂਕੀ ਦੀ ਵਿਕਰੀ ‘ਚ ਲਗਾਤਾਰ ਗਿਰਾਵਟ ਦੇਖਣ ਨੂੰ ਮਿਲ ਰਹੀ ਹੈ। ਟਾਟਾ ਨੇ ਅਪ੍ਰੈਲ ਮਹੀਨੇ ‘ਚ ਜ਼ਬਰਦਸਤ ਵਾਧਾ ਦਰਜ ਕੀਤਾ ਹੈ। ਅਪ੍ਰੈਲ ਦੀ ਵਿਕਰੀ ਰਿਪੋਰਟ ਦੇ ਅਨੁਸਾਰ, ਮਾਰੂਤੀ ਸੁਜ਼ੂਕੀ ਦੀ ਥੋਕ ਵਿਕਰੀ ਅਪ੍ਰੈਲ ਵਿੱਚ 6 ਪ੍ਰਤੀਸ਼ਤ ਅਤੇ ਹੁੰਡਈ ਦੀ ਥੋਕ ਵਿਕਰੀ ਵਿੱਚ 5 ਪ੍ਰਤੀਸ਼ਤ ਦੀ ਗਿਰਾਵਟ ਦਰਜ ਕੀਤੀ ਗਈ ਹੈ, ਜਦੋਂ ਕਿ ਟਾਟਾ ਮੋਟਰਜ਼ ਨੇ ਪਿਛਲੇ ਸਾਲ ਦੇ ਮੁਕਾਬਲੇ ਇਸ ਸਾਲ ਥੋਕ ਵਿਕਰੀ ਵਿੱਚ 74 ਪ੍ਰਤੀਸ਼ਤ ਵਾਧਾ ਦਰਜ ਕੀਤਾ ਹੈ।
ਦੇਸ਼ ਦੀ ਸਭ ਤੋਂ ਵੱਡੀ ਕਾਰ ਨਿਰਮਾਤਾ ਕੰਪਨੀ ਮਾਰੂਤੀ ਸੁਜ਼ੂਕੀ ਇੰਡੀਆ (ਐੱਮ.ਐੱਸ.ਆਈ.) ਨੇ ਐਤਵਾਰ ਨੂੰ ਅਪ੍ਰੈਲ ‘ਚ ਕੁੱਲ ਥੋਕ ਵਿਕਰੀ ‘ਚ 6 ਫੀਸਦੀ ਦੀ ਗਿਰਾਵਟ ਦਰਜ ਕੀਤੀ ਅਤੇ ਇਹ 1,50,661 ਇਕਾਈਆਂ ‘ਤੇ ਪਹੁੰਚ ਗਈ। ਐਮਐਸਆਈ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਕੰਪਨੀ ਨੇ ਅਪ੍ਰੈਲ 2021 ਵਿੱਚ ਡੀਲਰਾਂ ਨੂੰ 1,59,691 ਯੂਨਿਟ ਭੇਜੇ ਸਨ। ਇਸ ਦੇ ਨਾਲ ਹੀ ਪਿਛਲੇ ਮਹੀਨੇ ਕੰਪਨੀ ਦੀ ਘਰੇਲੂ ਵਿਕਰੀ ਅਪ੍ਰੈਲ 2021 ‘ਚ 1,42,454 ਇਕਾਈਆਂ ਤੋਂ 7 ਫੀਸਦੀ ਘੱਟ ਕੇ 1,32,248 ਇਕਾਈ ਰਹਿ ਗਈ। ਆਲਟੋ ਅਤੇ ਐਸ-ਪ੍ਰੇਸੋ ਸਮੇਤ ਮਿੰਨੀ ਕਾਰਾਂ ਦੀ ਵਿਕਰੀ ਪਿਛਲੇ ਸਾਲ ਇਸੇ ਮਹੀਨੇ 25,041 ਤੋਂ 32 ਫੀਸਦੀ ਘੱਟ ਕੇ 17,137 ਇਕਾਈ ਰਹਿ ਗਈ। ਇਸੇ ਤਰ੍ਹਾਂ, ਸਵਿਫਟ, ਸੇਲੇਰੀਓ, ਇਗਨਿਸ, ਬਲੇਨੋ ਅਤੇ ਡਿਜ਼ਾਇਰ ਵਰਗੇ ਮਾਡਲਾਂ ਸਮੇਤ ਸੰਖੇਪ ਹਿੱਸੇ ਵਿੱਚ ਵਿਕਰੀ ਅਪ੍ਰੈਲ 2021 ਵਿੱਚ 72,318 ਦੇ ਮੁਕਾਬਲੇ 18 ਫੀਸਦੀ ਘੱਟ ਕੇ 59,184 ਯੂਨਿਟ ਰਹਿ ਗਈ। ਮੱਧ-ਆਕਾਰ ਦੀ ਸੇਡਾਨ ਸਿਆਜ਼ ਦੀ ਵਿਕਰੀ ਅਪ੍ਰੈਲ 2021 ਵਿੱਚ 1,567 ਤੋਂ ਘਟ ਕੇ 579 ਯੂਨਿਟ ਰਹਿ ਗਈ।
ਹੁੰਡਈ ਮੋਟਰ ਇੰਡੀਆ ਨੇ ਕਿਹਾ ਕਿ ਅਪ੍ਰੈਲ 2022 ‘ਚ ਉਸ ਦੀ ਕੁੱਲ ਵਿਕਰੀ ਪੰਜ ਫੀਸਦੀ ਘੱਟ ਕੇ 56,201 ਇਕਾਈ ਰਹਿ ਗਈ। ਹੁੰਡਈ ਮੋਟਰ ਇੰਡੀਆ ਲਿਮਟਿਡ ਨੇ ਇਕ ਬਿਆਨ ‘ਚ ਕਿਹਾ ਕਿ ਕੰਪਨੀ ਨੇ ਪਿਛਲੇ ਸਾਲ ਇਸੇ ਮਹੀਨੇ 59,203 ਯੂਨਿਟਸ ਵੇਚੇ ਸਨ। ਘਰੇਲੂ ਵਿਕਰੀ ਅਪ੍ਰੈਲ 2021 ਦੇ 49,002 ਯੂਨਿਟ ਤੋਂ ਪਿਛਲੇ ਮਹੀਨੇ 10 ਫੀਸਦੀ ਘੱਟ ਕੇ 44,001 ਯੂਨਿਟ ਰਹਿ ਗਈ। ਆਟੋ ਕੰਪਨੀ ਨੇ ਕਿਹਾ ਕਿ ਬਰਾਮਦ ਪਿਛਲੇ ਸਾਲ ਅਪ੍ਰੈਲ ‘ਚ 10,201 ਇਕਾਈਆਂ ਦੇ ਮੁਕਾਬਲੇ ਵਧ ਕੇ 12,200 ਇਕਾਈਆਂ ‘ਤੇ ਪਹੁੰਚ ਗਈ ਹੈ।