ਦਿੱਲੀ : ਭਾਰਤ ਦੀ ਰੈਂਕਿੰਗ ਖੁਸ਼ਹਾਲ ਦੇਸ਼ਾਂ ਦੀ ਲਿਸਟ ਵਿਚ 136ਵੀਂ ਹੈ।
ਸੰਯੁਕਤ ਰਾਸ਼ਟਰ ਦੇ ਸਾਲਾਨਾ ਖੁਸ਼ੀ ਸੂਚਕ ਅੰਕ ਵਿੱਚ ਫਿਨਲੈਂਡ ਨੂੰ ਲਗਾਤਾਰ ਪੰਜਵੇਂ ਸਾਲ ਦੁਨੀਆ ਦਾ ਸਭ ਤੋਂ ਖੁਸ਼ਹਾਲ ਦੇਸ਼ ਚੁਣਿਆ ਗਿਆ ਹੈ। ਜਦੋਂ ਕਿ ਅਫਗਾਨਿਸਤਾਨ ਸਭ ਤੋਂ ਦੁਖੀ ਦੇਸ਼ ਹੈ, ਜੋ ਤਾਲਿਬਾਨੀ ਸ਼ਾਸਨ ਨਾਲ ਜੂਝ ਰਿਹਾ ਹੈ।
ਡੈਨਮਾਰਕ, ਆਈਸਲੈਂਡ, ਸਵਿਟਜ਼ਰਲੈਂਡ ਅਤੇ ਨੀਦਰਲੈਂਡ ਚੋਟੀ ਦੇ 5 ਵਿਚ ਸਭ ਤੋਂ ਖੁਸ਼ਹਾਲ ਦੇਸ਼ਾਂ ਵਿਚ ਸ਼ਾਮਲ ਹਨ। ਜਦਕਿ ਅਮਰੀਕਾ 16ਵੇਂ ਅਤੇ ਬ੍ਰਿਟੇਨ 17ਵੇਂ ਸਥਾਨ ‘ਤੇ ਹੈ। ਭਾਰਤ ਇਸ ਸੂਚੀ ਵਿੱਚ 136ਵੇਂ ਨੰਬਰ ‘ਤੇ ਹੈ। ਪਿਛਲੀ ਵਾਰ ਭਾਰਤ ਦਾ ਨੰਬਰ 139ਵਾਂ ਸੀ, ਯਾਨੀ ਭਾਰਤ ਦੀ ਰੈਂਕਿੰਗ ਵਿੱਚ ਤਿੰਨ ਸਥਾਨਾਂ ਦਾ ਸੁਧਾਰ ਹੋਇਆ ਹੈ।
ਦੂਜੇ ਪਾਸੇ ਗੁਆਂਢੀ ਦੇਸ਼ ਪਾਕਿਸਤਾਨ 121ਵੇਂ ਰੈਂਕ ਨਾਲ ਭਾਰਤ ਨਾਲੋਂ ਬਿਹਤਰ ਸਥਿਤੀ ਵਿੱਚ ਹੈ। ਇਸ ਜਾਰੀ ਕੀਤੀ ਗਈ ਇਸ ਸੂਚੀ ‘ਚ ਸਰਬੀਆ, ਬੁਲਗਾਰੀਆ ਅਤੇ ਰੋਮਾਨੀਆ ‘ਚ ਬਿਹਤਰ ਜ਼ਿੰਦਗੀ ਜਿਊਣ ‘ਚ ਸਭ ਤੋਂ ਜ਼ਿਆਦਾ ਵਾਧਾ ਹੋਇਆ ਹੈ।
ਵਰਲਡ ਹੈਪੀਨੈਸ ਟੇਬਲ ਵਿੱਚ ਸਭ ਤੋਂ ਵੱਡੀ ਗਿਰਾਵਟ ਲੇਬਨਾਨ, ਵੈਨੇਜ਼ੁਏਲਾ ਅਤੇ ਅਫਗਾਨਿਸਤਾਨ ਵਿੱਚ ਆਈ ਹੈ। ਲੇਬਨਾਨ ਦਾ ਨੰਬਰ 144 ਹੈ, ਜੋ ਆਰਥਿਕ ਮੰਦੀ ਦਾ ਸਾਹਮਣਾ ਕਰ ਰਿਹਾ ਹੈ। ਜਦਕਿ ਜ਼ਿੰਬਾਬਵੇ 143ਵੇਂ ਨੰਬਰ ਤੇ ਰਿਹਾ।
ਪਿਛਲੇ ਸਾਲ ਅਗਸਤ ‘ਚ ਤਾਲਿਬਾਨ ਦੇ ਮੁੜ ਸੱਤਾ ‘ਚ ਆਉਣ ਤੋਂ ਬਾਅਦ ਜੰਗ ਨਾਲ ਪ੍ਰਭਾਵਿਤ ਅਫਗਾਨਿਸਤਾਨ ਪਹਿਲਾਂ ਹੀ ਸੂਚੀ ‘ਚ ਸਭ ਤੋਂ ਹੇਠਾਂ ਹੈ। ਯੂਨੀਸੇਫ ਦਾ ਅੰਦਾਜ਼ਾ ਹੈ ਕਿ ਜੇਕਰ ਮਦਦ ਨਾ ਦਿੱਤੀ ਗਈ ਤਾਂ ਪੰਜ ਸਾਲ ਤੋਂ ਘੱਟ ਉਮਰ ਦੇ 10 ਲੱਖ ਬੱਚੇ ਇਸ ਸਰਦੀਆਂ ਵਿੱਚ ਭੁੱਖ ਨਾਲ ਮਰ ਸਕਦੇ ਹਨ। ਵਰਲਡ ਹੈਪੀਨੈਸ ਰਿਪੋਰਟ ਪਿਛਲੇ ਦਸ ਸਾਲਾਂ ਤੋਂ ਤਿਆਰ ਕੀਤੀ ਜਾ ਰਹੀ ਹੈ।
ਇਸ ਨੂੰ ਤਿਆਰ ਕਰਨ ਲਈ ਲੋਕਾਂ ਦੀਆਂ ਖੁਸ਼ੀਆਂ ਦੇ ਮੁਲਾਂਕਣ ਦੇ ਨਾਲ-ਨਾਲ ਆਰਥਿਕ ਅਤੇ ਸਮਾਜਿਕ ਅੰਕੜਿਆਂ ਨੂੰ ਵੀ ਦੇਖਿਆ ਜਾਂਦਾ ਹੈ। ਇਸ ਨੂੰ ਤਿੰਨ ਸਾਲਾਂ ਦੇ ਔਸਤ ਅੰਕੜਿਆਂ ਦੇ ਆਧਾਰ ‘ਤੇ ਖੁਸ਼ੀ ‘ਤੇ ਜ਼ੀਰੋ ਤੋਂ 10 ਦਾ ਸਕੇਲ ਦਿੱਤਾ ਗਿਆ ਹੈ। ਹਾਲਾਂਕਿ ਸੰਯੁਕਤ ਰਾਸ਼ਟਰ ਦੀ ਇਹ ਤਾਜ਼ਾ ਰਿਪੋਰਟ ਯੂਕਰੇਨ ‘ਤੇ ਰੂਸੀ ਹਮਲੇ ਤੋਂ ਪਹਿਲਾਂ ਤਿਆਰ ਕੀਤੀ ਗਈ ਸੀ। ਇਸੇ ਲਈ ਜੰਗ ਨਾਲ ਜੂਝ ਰਹੇ ਰੂਸ ਦਾ ਨੰਬਰ 80 ਅਤੇ ਯੂਕਰੇਨ ਦਾ ਨੰਬਰ 98 ਹੈ।
ਰਿਪੋਰਟ ਦੇ ਸਹਿ-ਲੇਖਕ ਜੈਫਰੀ ਸਾਕਸ ਨੇ ਲਿਖਿਆ- ਵਰਲਡ ਹੈਪੀਨੈਸ ਰਿਪੋਰਟ ਬਣਾਉਣ ਦੇ ਸਾਲਾਂ ਬਾਅਦ ਇਹ ਪਤਾ ਲੱਗਾ ਹੈ ਕਿ ਖੁਸ਼ਹਾਲੀ ਲਈ ਸਮਾਜਿਕ ਸਹਾਇਤਾ, ਉਦਾਰਤਾ, ਸਰਕਾਰ ਦੀ ਇਮਾਨਦਾਰੀ ਬਹੁਤ ਜ਼ਰੂਰੀ ਹੈ।
ਵਿਸ਼ਵ ਨੇਤਾਵਾਂ ਨੂੰ ਇਸ ਨੂੰ ਧਿਆਨ ਵਿੱਚ ਰੱਖਣਾ ਚਾਹੀਦਾ ਹੈ। ਰਿਪੋਰਟ ਬਣਾਉਣ ਵਾਲਿਆਂ ਨੇ ਕੋਰੋਨਾ ਮਹਾਂਮਾਰੀ ਤੋਂ ਪਹਿਲਾਂ ਅਤੇ ਬਾਅਦ ਦੇ ਸਮੇਂ ਦੀ ਵਰਤੋਂ ਕੀਤੀ ਹੈ। ਇਸ ਦੇ ਨਾਲ ਹੀ ਲੋਕਾਂ ਦੀਆਂ ਭਾਵਨਾਵਾਂ ਦੀ ਤੁਲਨਾ ਕਰਨ ਲਈ ਸੋਸ਼ਲ ਮੀਡੀਆ ਦਾ ਡਾਟਾ ਵੀ ਲਿਆ ਗਿਆ ਹੈ। 18 ਦੇਸ਼ਾਂ ਵਿੱਚ ਚਿੰਤਾ ਅਤੇ ਉਦਾਸੀ ਵਿੱਚ ਜ਼ਬਰਦਸਤ ਵਾਧਾ ਪਾਇਆ ਗਿਆ ਹੈ। ਪਰ, ਗੁੱਸੇ ਦੀਆਂ ਭਾਵਨਾਵਾਂ ਵਿੱਚ ਗਿਰਾਵਟ ਆਈ ਹੈ।
