ਪਹਿਲਗਾਮ : ਅਭਿਨੇਤਾ ਇਮਰਾਨ ਹਾਸ਼ਮੀ ਹਾਲ ਹੀ ਵਿੱਚ ਆਪਣੀ ਆਉਣ ਵਾਲੀ ਫਿਲਮ ਗਰਾਊਂਡ ਜ਼ੀਰੋ ਦੀ ਸ਼ੂਟਿੰਗ ਲਈ ਜੰਮੂ-ਕਸ਼ਮੀਰ ਪਹੁੰਚੇ ਹਨ। ਇਸ ਦੇ ਨਾਲ ਹੀ ਅਦਾਕਾਰ ਨੂੰ ਲੈ ਕੇ ਇੱਕ ਵੱਡੀ ਖਬਰ ਸਾਹਮਣੇ ਆ ਰਹੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਜੰਮੂ-ਕਸ਼ਮੀਰ ਦੇ ਪਹਿਲਗਾਮ ਦੇ ਮੁੱਖ ਬਾਜ਼ਾਰ ‘ਚ ਅਦਾਕਾਰ ‘ਤੇ ਪੱਥਰਬਾਜ਼ੀ ਕੀਤੀ ਗਈ ਹੈ। ਰਿਪੋਰਟ ਮੁਤਾਬਕ ਕੁਝ ਅਣਪਛਾਤੇ ਲੋਕਾਂ ਨੇ ਇਮਰਾਨ ਹਾਸ਼ਮੀ ‘ਤੇ ਪਥਰਾਅ ਕੀਤਾ। ਫਿਲਮ ਗਰਾਊਂਡ ਜ਼ੀਰੋ ਦੀ ਸ਼ੂਟਿੰਗ ਖਤਮ ਕਰਨ ਤੋਂ ਬਾਅਦ ਕਲਾਕਾਰ ਸੈਰ ਕਰਨ ਲਈ ਨਿਕਲੇ, ਜਿਸ ਤੋਂ ਬਾਅਦ ਕੁਝ ਲੋਕਾਂ ਨੇ ਇਮਰਾਨ ਹਾਸ਼ਮੀ ਤੇ ਹੋਰਾਂ ‘ਤੇ ਪਥਰਾਅ ਸ਼ੁਰੂ ਕਰ ਦਿੱਤਾ। ਇਸ ਮਾਮਲੇ ਵਿੱਚ ਪਹਿਲਗਾਮ ਥਾਣੇ ਵਿੱਚ ਐਫਆਈਆਰ ਦਰਜ ਕੀਤੀ ਗਈ ਹੈ। ਪਥਰਾਅ ਕਰਨ ਵਾਲਿਆਂ ‘ਤੇ ਧਾਰਾ 147, 148, 370, 336, 323 ਲਗਾਈਆਂ ਗਈਆਂ ਹਨ। ਫਿਲਮ ਗਰਾਊਂਡ ਜ਼ੀਰੋ ਦੀ ਗੱਲ ਕਰੀਏ ਤਾਂ ਇਹ ਸੀਮਾ ਸੁਰੱਖਿਆ ਬਲ ਦੇ ਜਵਾਨ ‘ਤੇ ਆਧਾਰਿਤ ਹੈ। ਇਮਰਾਨ ਹਾਸ਼ਮੀ ਇਸ ਫਿਲਮ ‘ਚ ਫੌਜੀ ਅਫਸਰ ਦੇ ਕਿਰਦਾਰ ‘ਚ ਨਜ਼ਰ ਆਉਣ ਵਾਲੇ ਹਨ। ਪਹਿਲਗਾਮ ਤੋਂ ਪਹਿਲਾਂ ਇਮਰਾਨ ਹਾਸ਼ਮੀ ਸ਼੍ਰੀਨਗਰ ‘ਚ ਸ਼ੂਟਿੰਗ ਕਰ ਰਹੇ ਸਨ। ਇਮਰਾਨ ਨੇ ਸ਼੍ਰੀਨਗਰ ਦੇ ਐਸਪੀ ਕਾਲਜ ਵਿੱਚ ਸ਼ੂਟਿੰਗ ਕੀਤੀ ਸੀ। ਫਿਲਮ ‘ਚ ਹਾਸ਼ਮੀ ਦੇ ਨਾਲ ਸਾਈ ਤਾਮਹਣਕਰ ਅਤੇ ਜ਼ੋਇਆ ਹੁਸੈਨ ਨਜ਼ਰ ਆਉਣਗੀਆਂ। ਫਿਲਮ ‘ਚ ਸਾਈ ਅਤੇ ਇਮਰਾਨ ਹਾਸ਼ਮੀ ਰੋਮਾਂਸ ਕਰਦੇ ਨਜ਼ਰ ਆਉਣਗੇ। ਖਬਰ ਹੈ ਕਿ ਫਿਲਮ ‘ਚ ਸਾਈ ਇਮਰਾਨ ਦੀ ਪਤਨੀ ਦਾ ਕਿਰਦਾਰ ਨਿਭਾਉਂਦੀ ਨਜ਼ਰ ਆਵੇਗੀ। ਇਸ ਫਿਲਮ ਨੂੰ ਤੇਜਸ ਦਿਓਸਕਰ ਡਾਇਰੈਕਟ ਕਰ ਰਹੇ ਹਨ। ਅਦਾਕਾਰ ਦੇ ਵਰਕ ਫਰੰਟ ਦੀ ਗੱਲ ਕਰੀਏ ਤਾਂ ਉਹ ਜਲਦੀ ਹੀ ਅਕਸ਼ੈ ਕੁਮਾਰ ਨਾਲ ਫਿਲਮ ਸੈਲਫੀ ਵਿੱਚ ਨਜ਼ਰ ਆਉਣਗੇ। ਸਲਮਾਨ ਖਾਨ ਦੀ ਫਿਲਮ ‘ਟਾਈਗਰ 3’ ‘ਚ ਇਮਰਾਨ ਹਾਸ਼ਮੀ ਵੀ ਅਹਿਮ ਭੂਮਿਕਾ ਨਿਭਾਅ ਰਹੇ ਹਨ। ਫਿਲਮ ਦਾ ਨਿਰਦੇਸ਼ਨ ਮਨੀਸ਼ਾ ਸ਼ਰਮਾ ਕਰ ਰਹੀ ਹੈ ਅਤੇ ਅਗਲੇ ਸਾਲ ਈਦ ਦੇ ਖਾਸ ਮੌਕੇ ‘ਤੇ ਸਿਨੇਮਾਘਰਾਂ ‘ਚ ਰਿਲੀਜ਼ ਹੋਵੇਗੀ।